Thangta le Khenno

Dear All,

Zomi SDA groups te tawh kisai lamdang a sa kha zong ki-om in um mah ing. Kei' muhna tawm hong gen pak ning.

zomisda yahoogroups pen U Khenno Talek in US a omlai a hong pat khiat hi in tuni dong member te adingin tha kiam hetlo in i phattuam pih hi. I khawl het kei ding hi.

Tun lawm Thangta in Norway pan hong pankhia in googlegroups tawh hong bawla kha thum sungin member 300 val bang hong pha ziau leuleu hi. Ken zong confuse ka hihmanin ka dong a,

googlegroups tawh hong bawl pen zomisda yahoogroups puahphatna leh hawmthawhna, dem nopna cihbang kihello hi. Tua teh official a kibawl cih bang zong hi lo hi. Mission khat sungah College khat val om thei lo ding cihte pawl dan, min leh logo pen ko bek zat theih cih dan om lo ahihmanin a website picing taktak lah bawl zo nailo-a thu hoih nono leh group hoih nono tampi bawl zo leeng hong cih manin kei bang a support pawl ka hipah hi.

Ama gen laina-ah zomisda yahoogroups ah menber tamveipi ka nget hangin ka ID hong kihelsak thei nailo ahihmanin zomi adventist communication min zang leng zomi adventist thu ka omna na ah ka zaak theih ding ka lametna hang zong hi hong ci hi. Tua banah Adventist min ka kihelsak hangin a ut khempeuh lut thei in biakna thu bek hilo zomite' theihhuai thu leh la a om bangbang zong kigelh thei hi hong ci hi. Tua banah ka khua laitui a om SDA te ading mahmah in zong hong theihpih hunhun uh teh pawlsunga tha khauhna a neih tuam ding uh zong ka lamen hi hong ci hi. Laitui ah SDA Biakinn hoih tak khat a dinna ding zong thungetna ah hong phawk un hong ci hi. Kei zong ZOGAM khuapi te laka a thupi pen khat Laitui khua ah SDA a kip ding leh a khantoh ding hong lunggulh pih mah ing ei lawm ka ci hi.

Tua mah zah khat in groupmail sunga lai kigelhte pen a quality nei zaw diak dingin amau group moderator te in hong puah man leh uthuai ka sa hi. A hizongin fulltime a kicial khasum sangte in zong mihing thaneemna i neih tek mahbangin a hun neih sunsun uh pana hong kipia khia U Khenno Talek leh Lawm Thangta te tungah lungdam ka ko hi.

Tu hun ciangin internet tawh advertisment nasep nading leh email zatna dingin google ( gmail te) in seh li suah seh thum val bang kizangta hi. Nidangin ahihleh Yahoo leh AOL cihte khawng a zang tampen hi. Zomite sungah zong email ID a bawl thak 90% bangin gmail mah bawl in kizang ta ahihmanin a hoihzaw kei zongin zomisda leh zomi adventist communication pen a kibangin i neih khopna in siatna lua om lo dingin ka lamen hi.


Lawm Thangta pen a minpi Zam Suan Thang hi in Maungmya pan in BBA tawh a zo khat ahi hi. Amah pen Laitui khua suak hi in sa limlim a duh mel lo SDA tangsuah khat hi-a, a U pen mi theih mahmah khat a hi Cin Za Kai (tulaitak Mandalay ) a hi hi. Thangta pen a nu leh a pa RC a hi hi. A nulehpa pi leh pu khang pana SDA sisan tawh a khangto te sangin SDA a veizaw phial khata ka seh manin tha ka pia mahmah hi. Laitui khua ah pen nidang pek in Pr Lian Khan Dal te in effort bawl ngei leh SDA zong pawl khat om ngei a hih hangin a mit kik hi-a a hi zongin 2006 hiam khat in Thangta' veina tawh effort kibawl kika mi 16 tui kiphum member 25 khawng kingah hi. Tudong mah a hing liailiai suak in Lawibual SDA Church in a van dan hi phot hi. Thangta in hih effort a bawl ding laitakin a tacil a suahzawh kalnih lian bek pha panaYangon ah a zi tawh a innsapna ah a zi leh a ta nusia in hih effort va bawl hi. Alawmnu ka dot kikna ah a tuung in bel ka khasia dektak man hi, a hizongin kei zong SDA sang ahoih lai Sia Lian Pau sep lai in Lawibual, Tedim ah ka kah ngei-a, ka pasal lunggulhna a hi SDA thupuak Laitui ah va taangko dinga pai a hihmanin ka kizo mahmah hi cih hong gen kik ngei hi. Effort bawl tungtangin hong lut dingzah hong lut lohna thu om a, tua pen Laitui ah sih ciangin han pen a pawlpawl in kinei in kihawm cih bang om lo ahihmanin nat leh sat leh sih ciang khualna tampi tawh hong suak lo uh hi. Thu khatah pen upna neu lai zong i cih thei kha ding hi. Kei zong tua han mun leina ding donation ngenin Aizawl ah Thangta ka vak pih a Pu Sangchi in zong Rs 400 ( zali ) hong pia hi. Tua hunteng khit ciangin a taneu leh a zi kiang Yangon ah ciah in tu in ahihleh Norway ah om hi.

HOng sau deudau pian in SDA khangno tampi in i khua tek i vei banah tulaitak i phak nailohna Tedim gamah Khuano kual, Zo kual teng leh Zogam mun tuamtuam leh Kawlgam sungah i masuan a hi i thupuak vantungmi thumte tangkona i va puak ding lungsim nei-a hih hong tangsuah Thangta tungtawn in tha la in i kipiak ding zong kong hanthawn nuam hi. SDA khangthak te pen upna leh zuihna lamah i dau tektek hi. Tua ahihmanin na lianpi sem dingin akuama peuh ki ap pha ciat in Tamveipi akibawl khitna sa khua te a Effort i bawlbawl sangin or i bawlkikik mah bangin a kiphanailo khuate ah bawl ding lungsim zong i neih ding hoih ka sa hi.



Pawlpi itna, groupte itna leh thapiakna tawh

Hau Suan Cin
Will Computer
Tedim