WHO IS THE 'CHRIST' for ZOMI

Hang Khan Lian to zomi, Zomi, ZIS97, Tuimang
show details Apr 6 (2 days ago)



Sia Khai leh alunglut teng,

Nong thusuahsak lunglut huai, ngaihsut huai mahmah thu ahihlam ka thei aa, kua taktak himawk mah dinghiam ci-in sau veipi ka na zon napan ka muhkhiat teng kong zasak pahhi.

Kawlgam ading Khrih icih in kua himawk ding ahihiam?

Kawlgam ading Christ (Jesus) pen suak khin ahihlam ka mukhia aa, Suakkhin ahihhang akituamna/akitunna puan Kawlgam khua hun tawh kituaklo zah in sah, thuap tamlua, puan in uumcip ahihman in thahat zolo in mi gina ong suakding maw, ong suak loding kithei nailo zah ahihman in amin kiphuak zo nailo hi.
Tua akitunna puante ih hepkhiat, phelkhiatsak masiah amin kiphuak theilo ding aa, kua pen taktak ahitam ci aa ihzonzon ding mah ong suakdinghi.

Kawlgam ading ongsuak Christ (Jesus) kitunna puante:

1.
a pianna a Pa'n ong nusiatsan
1947 kum in nau min phuakding kithawi, ki-uum lingleng kimlai, a Pa ong kisuamlupsak ahihman in kiphuak zolo hi.
Gamh deihman bek
Pa kik tawh akithuah ciang, a Pa kik in agamh deihman bek ong hi aa nau min phuahding phawk kha nawnlo in tuni dong min phuahloh in om aa Kawlgam ading Christ kua hiam cih akithei kha nawnlo ahihi.
2. Huaihamna puan
Pa lungsim apualo Pa kik in ama gamh luahdingbek thupisa ahihman in minam lian, minam pawlcingte kawi in, mai-et ahihman in, innkuan sung ah kitot, kiseelna, kihazaatna tampi ong piang in naumin kiphuak zolo leuleuhi. Minam khat leh khat ki langdona, kigal neihna, kilemlohna, tualgal dong ki ettheihlohna ong om ahihman in naumin phuah akisawm nawnlo ong suakhi.
3. Angsung theihna puan
Ngia hon in ong umcih
Innkuan kilemloh paulam in dai dungdung ah ngia ong laang in naumin phuah genloh ihhuang pawl khat nangawn ong eusak ahihman in, naumin phuah tawh kigamla semsem hi.
Sangaak lang
"Gamsia kaang sangaak nuamna" acih mahbangin, Innsung kilemloh paulam in sangaak ong laang pah aa uino akno teng leh neih sunsun teng abeibei hita hi. Nau min kiphuiak zolo suakhi.
Hih angsung theihna abulpi in Piansakna ihtheihlohman leh leitung vantung ama thu aa ong piang ihsak man ahihi. Ama thu aa piangtawm sa ihihman in itding, kepding puahding ngaihsun nawnlo in, kangah manlai, cihtawh kituhteh ngeingai in ngia hon gansi kituh mahmah akibang ahihi. Singkung lopa aa kipan aki netuum ong suakhi.

4. Kiphatsakna, kineihsakna puan zapi
Kawlgam ading Christ 1813 kum in ongsuak ahihhang gamkeekte ong lut huntawh kituak ahihman in, gamkeek puan tawh kitun pah aa gammi te'n naumin phuak khalo hi. Tuakhit Karente khutsung ong tunciang Karen puan tawh kitun leuleu ahihman in Karen min mah phuah sawm uh aa Karen'biakna suah uhhi. Kachin in zong amau min mah phuah sawm, Zomite'n zong 1899 kum in ongsuak ahihhang Zomin mah piaksawm ihihman in naumin akiphuak zolo ahihi. Ongsuak naungeek pen kineisak ciat, anei ding kituh ihihman in naumin kiphuak zolo suakhi.

5. Thehban lohna puanpi
Kawlgam ading ongsuak naungek pen pawlkhat in mihing, cilehsa tungtawn aa mihingte sung aa ongpiang ahihman in Zeisu bek phuah sawm uh aa, sathau nilhpa ahihdinglam kiphawk khalohi. Minamte khanggui sim nading, mihingte tangthu sung aa ong kihel ahihhang, Pasian sathaunilh pahtawina angahding akilawm ahihi. Tua ding kiphawk khalo in amin kiphuak khial zong hikha dinghi.

6. Masak loh ding masak khaakna puanpi
Pawlkhat leuleu in hih naungek hang aa ngahding hamphatna bek lam en lua ahihman in, pahtawina ngahdingin Zion mualtung ah na tu khol aa, pawlkhat in lenggah phung leh thei nuai aa tutding masak kha ahihman in nau min phuahding kimangngilh hi.

7. Thagum leh molhtum puanpi
Keivom te leh tuuno, humpi neelkai leh bawngtalnote kithuah hunding thagum hatna, molhtum kihtaakna tawh sakha ihihman in, molhtum suihna leh thasinna in hunbei, neihsa bei ahihman in Christ min kiphuak manlo zong hilaihi.

8. Kisimmawhna puanpi
Adang puanpi khat in, minamneute simmawhna, mizawng daipaamte simmawhna, kihauhsakna, kiliatsakna, puan zapi tawh khuhcip ahihman in naungeek thazawm sakhi.

Akitunna puan atamhang kigina tunlo
Naungek tunna puan atam hang agina omlo, kigina tunlo, khuahun tawh kituaklo ahihman in apum bek lum in akhut akhe vot aa acidamna siasak ahihman in mi taktak in ong nungta zolo ding suakhi.
Hihteng ihphel masiah ih lam-et Kawlgam ading Christ min kiphuak zolo ding lam-et huai zaw aa, mi nungta in ong piang ngeilo kha zaw ding hi.
Hih atung aa ban ah naungelk kitunna puan daa tampi omlai ahihhang kei muhpak hiteng ahihi. Hihteng daa khat khit daa khat ih hawkkhiat kei leh naungeek asuah khit hang mi khangcing ong suak ngeilo ding ahihlam kei muhna teng kong zasak hi.
Topa'n Thupha ong pia in ki-itna, kileemna, kingaihna gam kiphut mengmeng tahen.
Nang ngaihsutna tawh akituah kei leh ngaidam cihding hilo di'a.

Hang Khan Lian